· Beasaingo bi Parrokiak: Andre Mariaren Zeruratzearena eta Loinazko San Martinena.
· Auzoetako Parrokiak: Arriaran, Astigarreta, Garin eta Aratz-Matxinbentakoa.
· Kapera, baseliza eta ermitak: Kristo Gurutziltzatua (Ezkiaga), Loinazko Andre Maria, Belengo Andre Maria, San Andres eta Arangoitiko Egoitzakoa.
· Eta azkenik, aterperik gabe, Dolareko Gurutzea eta Loinazko San Martinen gizairudia.

Informazioa, parrokia, ermita, kapera eta abarren arabera antolatuta dago. Bakoitzaren hasieran sarrera labur bat azaltzen da eta ondoren elementu bakoitzaren xehetasunak ematen dira, bere argazkia lagun duela. Halaber, lan bikaina egin da elementu bakoitzaren egite- edo eratze-data azaltzeko. Hitz batean esanda, liburu erabilgarria da, izan ere, bere tamaina txikia dela bide, bertan azaltzen diren lekuetara goazenean, aldean eramateko eroso bihurtzen da, eta horrela, askotan inguruan izan arren, gu konturatzen ez garen hainbat xehetasunez ohartaraziko gaitu.

Beharbada, liburu hau ikusi eta irakurtzen dutenek beren etxeetan dituzten irudi eta imajina ederrak ere aurki ditzakete.

Nolanahi ere, liburu honen asmoa ez da arte-balioak aurkeztea, baizik eta Beasain eta auzo-herrietako sendiek eta herritarrek mendez mende sinestatu, maitatu eta fede-eredutzat jarraitu dituzten ezaugarri maitagarri onenak kontenplatzea.

Kristau-esperientzia balio berdinekoa da, gizonezkoentzat, nahiz emakumezkoentzat, handientzat nahiz txikientzat, gazteentzat nahiz helduentzat.

Hori horrela dela pentsaturik, eliza edo parrokietan, erretauletan, nahiz alboetako aldareetan, mota guztietako sinestunentzat bizi-eredu bikainak aurki daitezkeela esan dezakegu. Esate baterako:

· Haurrentzat, Jesusen haurtzaroko irudikapenak, edo aingeru edo haur santuak.
· Gazteentzat, Jesusen gaztaroko irudikapenak, edo gazte santuak.
· Helduentzat, Jesusen heldutasun-irudikapenak, edo santu helduak.
· Gizonezkoen eredutzat, gizonezko santu ospetsuenak.
· Emakumezkoentzat, emakume santuenak.

Herri-erlijiotasunaren partaidetza nagusiena, herriarena berarena izan da. Nolakoak herriaren sentipenak eta ametsak, halakoak bere santuen aukeraketak. Beraz, herriaren sinismen-eragiletasuna gehienetan emakumezkoena izan denez, beti nabarmen agertu izan dira emakumezkoek bultzatutako santu-ereduak .

Baina Beasaingo kasuan, santurik gehienen ereduak, alde handiz gainera, gizonezkoenak dira. Beraz, herriaren santu-aukeraketa baino gehiago, eliza-eragileen aukeraketa izan dela aitortu beharrean gaude.

Amaitzeko, esan beharra dago, gure herria erlijiotasun handikoa izan dela beti, eta liburu honetan, orrialdez orrialde, irakurleak, gure arbasoen muin fedetsu hori dasta dezake.

1.- Beasaingo Udaleko Kultura Sailera joan edo Turismo Bulegora (Igartzako ermitan) eta dagokiona ordainduz

2.- Beasaingo Udaleko Kultur Sailera idatzi bat bidaliz zein liburu eskatzen den azalduz (Bidalketa gastuak ere ordaindu behar dira)

3.- INTERNET BIDEZ ESKATUZ
Eskatzailearen datuak eta helbidea azalduz. Udalak berriz korreo bidez bidaltzen du eskatutako alea "Ordainketaren truke" eta hartzaileak ordaintzen du liburuaren salneurria eta bidaltzeak sorrarazten dituen gastuak.