Karreratarrekin, aitonak, aitak eta semeak, hiru belaunaldik egindako ondarea dugu Beasainen, eta hirurek benetako arkitekto-leinua osatzen dute; gero ikusiko dugun bezala, ez ziren nabarmendu berek egindako lanen edertasun egoki eta mamitsuagatik bakarrik, ez, beste arkitektoek ere izango zuten haien eragina, eta ez dago zalantzarik Gipuzkoako arkitektura guztiaren ondorengo berezitasunak berek ezarri zituztela.

Hiruretan lehena, aitona, Pedro Karrera Arana jn. izan zen, 1679ko urriaren 19an, Beasaingo Errekartehaundi baserrian jaioa. Tomasa Aranburu Loinaz and.arekin ezkondu, eta ezkontza horretatik Martin Karrera Aranburu jn. jaio zen 1713ko martxoaren 23an, aipatu leinuko bigarrena. Martin jn. bi aldiz ezkondu zen, eta lehenengo emaztearekin, Orendaingo alaba zen Maria Egipziaka Artzadun and.arekin, Manuel Martin izeneko seme bat izan zuen, leinuko hirugarrena, hau ere Beasainen jaioa 1742ko abenduaren 25ean.
Ikus ditzagun orain beasaindar ospetsu hauek utzi zizkiguten obretako batzuk.
Pedro Karrera jn.ak Legazpiko elizako kanpandorrea eraiki zuen, eta baita herri bereko Udaletxe eder eta eratsua ere; baita Oñatiko ikastetxeko elizaurrea eta beste etxe partikular batzuk ere. 1731n hil zen 52 urte zituela.

Martin Karrera jn.ak, Mutiloako elizako harrilanak eta Elgoibarko Bartolome Deunaren parrokiako sakristia egin zituen eta Zegamako eliza berritu; Arrasateko Udaletxearen aurrealde zoragarria ere berak egin zuen; berak marraztu zituen, era berean, Eskoriatzako parrokiako planoak, Aretxabaletako parrokiako dorretxoak eta kanpandorrea, herri bereko herri-iturri apaingarria, Orendaingo eliza, Pasai San Pedrokoa, Tolosako Andre Mariren elizako bi dorretxoak eta kanpandorrea, Ibarrako zubia eta eliza, eta errota eta etxe partikular asko eta asko. Bere bizitza ez oso luzean - 55 urtez bizi izan zen -, bere gaitasunaren ezbairik gabeko frogak utzi zituen Gipuzkoan.

Manuel Martin Karrera jn.ak, bere aitak hasitako Pasai San Pedroko eliza amaitu zuen; 1779 eta 1783 bitartean Oñatiko Udaletxe eder eta dotorea egin zuen; herri bereko parrokiako dorrea ere marraztu zuen, ordurako apartekoak ziren Pedro Lizarazu (1525ean klaustro gotiko bikainaren egilea) eta Diego Siloeren estiloetara eta Rodrigo Gil Hontañonen estilo gotiko zaharkitura ezin hobeto egokituz. Arantzazuko eliza eta Ostatu zaharra ere, hau oso-osorik harlanduz, berak egin zituen. Bere ospea probintziako mugak gainditu eta Urduñaraino iritsi zen, eta han bidezko gorespenak merezi izan zituen Aduana-etxea egin zuen, eta Andre Mari elizako aurrealdea ere bai, bertako sakristia eta armairu eta kaxoiak; Zaldibiako parrokielizaren eta Gordexolan Pedro Breton jn.aren jauregi batentzako proiektuak ere egin zituen.

Hiru arkitekto hauekin beti aritu ziren lanean, hargintza eta beste lanbide batzuk zekizkiten senitartekoak.

Ikusten denez, On Pedrorekin hasiera adierazkor eta apala izan zuen leinu honek, eta On Martin aitarekin handitasuna eta trinkotasuna bereganatuz indartsu garatu zenak, On Manuel Martin semearekin gardendu egin zen askoz irudi zuzen eta dotoreagoak lortuz.