Beasainen jaio zen, gaur egun Nafarroa etorbideko 13. zenbakia duen etxean, 1905eko maiatzaren 4ean.

Lehen ikasketak herrian burutu ondoren Jesusen Lagundian sartu zen. Jadanik jesulaguna zela, Filosofian dotoretza egin zuen Erromako Unibertsitate Gregoriarrean, eta Pedagogia eta Psikologiakoak, berriz, Toulouse eta Lovainako Unibertsitateetan, bere ikasketak oraindik gehiago hedatuz Europako hainbat unibertsitate eta goi-mailako ikastetxetan.

Irakasle izan zen Colombiako Paston eta Ecuadorreko Riobamba eta Quiton. Irakasle gisa izan zituen kargu askoren artean, Gijongo Lan-Unibertsitatekoa, Santanderko Nazioarteko Unibertsitatekoa eta Salamancako Aitasantu Unibertsitatean izandako Pedagogia Katedra nabarmentzen dira.
Psikologo gisa, A. Garmendia Otaolak Norabide eta Aukeraketa profesionalerako hainbat Laborategi-Bulego sortu zituen Malagan, Sevillan, Bilbon, Gasteizen, etab.

Zenbait kultur elkartetako kide izan zen. Zine kritikaria ere bai, eta gai honi eta beste batzuei buruzko hainbat liburu idatzi zituen, horien artean nabarmenena "Beasain, patria de San Martín de Loinaz. Biografía de un Pueblo y un Santo" liburua, 1962an Japoniako 26 martirien, eta tartean gure Santuaren, Santu--aitortzearen I. Mendeurrena zela eta argitaratu zena.

1971ko urtarrilaren 25ean hil zen, 65 urte zituela, Jesuiten Deustuko egoitzan, Bizkaian.